20.3156
16.4219

Güllü Karanfil yaşaması hem gagauz dilinin durumu için

Опубликованно 17-11-2017, 15:33
Источник фотографии: facebook.com

Sabaa.md konuştu peetçiylän, filologiya doktorunnan, Güllü Karanfillän onun yaşaması için hem gagauz dilin durumu için.

-Canabiniz, Siz duudunuz Gagauziyada,  nasıl ӧlä oldu, ani şindi yaşȇȇrsınız hem çalışȇrsınız Türkiyedä?

- Duudum, büüdüm Gagauziyanın Ütülüküüyündä. Üürendim Azerbaycanda, Türkologiya fakultetindä. 10 yıl Azerbaycan Bilim Akademiyasında Dilcilik İnstitutunda çalıştım, doktorluk disertațiyamı orada korudum. Evlendim.  Orada üç uşaam duudu. 2007-da Moldovaya, Vatanıma döndük, Komratta erleştik. Bir kaç yıl  işledim Bilim aaraştırmaları merkezindä hem Komrat Devlet Universitetindä. Vatanımda pek islää kabledilmedim, İşsiz kaldım, kalp hastalıı kazandım. Ama kimseyä küsüm yok. Bän küsmää becermeerim. Sora Türkiyenin bir proyektinä  görä Türkiyedä postdoktora yaptım bir yıl. Uşaklarım da burda universitettlerdä üürenerlär. Onnara yakın olmak için buraya geçtik. İş buldum. İşleerim. 

Paramız bir payını gagauz dilinin gelişmesi  için kullanêrım. Kiyatlar, gagauz dili kursları, ‘Ayna’ jurnalı  hem başka. Bu iş için da sevinerim, çünkü uzakta bulunsam da halkımnan sıkı baalıyım. Dilin, literaturanın gelişmesi için becerdiimi yapma savaşêrım, taa çok yapmaa isteerim.


- Nezaman Siz çekettiniz peet yazmaa? Kaç yaşındaydınız ozaman?

Çekettim yazmaa 1986-cı yılda. 14 yaşındaydım.

Te açan şkolalarda Gagauz dili verilmää başladı, o zaman. Benim üüredicim Saveliy Ekonomov bana yardım etti, dooruttu benim şiirlerimi. Akıl verdi, nasaat etti. Topracıı ilin olsun.

- Ne Sizӓ ilham verer, angı konulara yazȇrsınız?

-Azerbaycanda yaşarkan, konularım  Vatana hasretti, Gagauzluk, Milli ruh. Okuyucu okursa bulacek cuvap bu soruşa kendisi.

- Türkiyadä yaşayarak, herzaman Gagauziyayı düşünersiniz. Nelär artık yaptınız ilerletmää deyni gagauz dilini hem nelär var plannarınızda?

- Savaşêrım yapmaa. Bir gagauz masa kalendarı çıkardık, sora gagauz annatmalarını türk dilina çevirdim, gagauz Şiir Antologiyasını çıkardım, sora ‘Ayna’ jurnalı, genç şairlerin kiyadı, youtube-da  gagauz dili kursları, kendi kiyatlarım, Türklärlän ortak bilim konferențiyalar yaptık...Proyektlär beklenilmedik geler.

- Ayleniz destekleer mi Sizin yaptıklarınızı/çalışmanızı?

- Elbetki, ayläm dayak olmasaydı bän bişey yapamayaceydım yalnız. Harçların büük kısmı aylemizin kesesindän gider. Parasız daadıldı Şiir Antologiyası, jurnallar, kiyatlar...

- Canabiniz çok işlär yapȇrsınız korumaa deyni gagauz dilini. Nicä düşünersiniz, gagauzlarda yok kolaylık mı, o sa yok havez üürenmää hem korumaa kendi dilini?

- Ana dili üürenilmeer, o ana südünnän lääzım geçsin.Te nasıl bizä geçti. Nekadar da yapsam, az olacek, eer  öndercilär örnek olmarsaydılar, eer insannarda milli ruh peydalanmarsa, eer her ana kendi uşaannan ana dilindä lafetmӓrsä... bütün yaptıklarımız boşuna.

- Neçin çoyu istämeer gagauz dilini üürenmää, hem ne var nicä yapmaa, ani insannarda/gençlerdӓ havez peydalansın?

- Gagauziyada dil politikasını yapmaa lääzım, milli ideya olmayana kadar gagauz dilindä lafedennär hep azalacek. Öndercilär tarafından Milli ruhun üüseldilmesi lääzım.

- Nesoy (ne iş için) danışmalarınız var gagauz insannara?

- Kendilerini korusunnar. Uşaklarınnan ana dilindä lafetsinnär, çünkü bizim kimniimizin pasportu- ana dilimiz gidärsä, mankurtlaa dooru yollanacez. Gagauz kalalım.

Saa olun cuvabınız için!

Похожие новости:
Gagauz filmı
Специальный репортер
20-10-2017, 21:24
Специальный репортер
17-10-2017, 16:44