"Hakikatçıların sesi" toplumun tanıtımı
Источник фотографии: sabaa.mdKomratta, Atatürk bibliotekasında "Hakikatçıların sesi" yaratma toplumun tanıtımı geçti. Kiyadın sayfalarına 12 avtorun çalışmalarını erleştirdilӓr. Materialları toplum için gagauz filologiya uurunda genç bilgiç Viktor Kopuşçu hazırladı.
"Hakikatçıların sesi" yaratma toplumun dünneya çıkması baalı ‘Hakikatın sesi’ gazetanın istoriyasınnan. İlk gazetayı 1907 yılda Ay-Boba Mihail Çakir tiparlamış. Bir bölük vakıdadan bu aydınnatmak proekti durgunmuştu, ama 2014- cü yılda Bilim aaraştırmak merkezindӓ çalışan lingvist-türkolog Viktor Kopuşçu barabar kendi batüsunnan boba Sergiylӓn verdilӓr ona eni yaşamak. Gazeta oldu ‘Aydınnık’ kultura-aydınnatmak cümnӓӓ topluluun bir çalışmak meyvası. Onda tiparlanêrlar diil sade din hem ruh için statiyalar, ama zamandaş yazıcıların hem peetçilerin işleri da, bundan kaarӓ, arhivlerdän alınma, unikal, cümneya seftӓ çıkan, şannı yaradıcıların zaametleri da. Yaratma toplumun temeli ‘Hakikatın sesi’ gazetasında durêr.
Bӓn herzaman pek sevinerim, açan ana dilimdӓ bişey okuyerım, canıma deyni bu nicӓ ilaçlı oloy. Onuştan biz kararladık gazetamız gagauz dilimizdӓ çıksın, şindi, gördüynӓn lӓӓzımnıı, statiyaları, hepsinӓ deyni kolay olsun okuma, iki grafikada tiparlêêrız. Birinci otuz dördüncü sayıyadan seçtik en uygun yaratmaları da düşündük bir toplum onnardan yapmaa, annattı boba Sergiy.
Kiyada redaktor Petri Çebotar oldu. Redaktorluk işindӓn kaarӓ, yazıcı paylaştı Stepan Kuroglunun özel arhivindӓn materiallarlan, Nikolay Baboglunun gagauz adetleri için yazılarınnan hem söleyişlerin açıklamalarınnan, angılarını kendisi Petri Çebotar türk sözlüklerindӓ hem başka literatura sızıntılarında aaraştırdı.
Viktor Kopuşçuylan çalışmaa pek kolaydı. Onun gibilӓr siirek var. Yaşlarına bakarak, pek çok zaamet başa çıkardı, bilgileri kaavi, aaraştırmaları derin. Biz bu toplumda aydınnaa çıkardık o işleri, angılar kendi gününü arhivlerda beklӓrdilӓr. Eldӓn yazılı sayfalar artık sararmışlar, yaprakları tutan telceezlӓr küflendilӓr, ama gagauz literaturasına bu materiallar pek paalı hem okumaa onnarı meraklı, söledi tanıtımda Petri Çebotar.
Kiyadı tipardan çıkarmaa deyni finans yardımı verdi ekonomika uurunda uzman hem KDU-da çalışan profesor Vitaliy Kürkçü.
Bӓn internettӓ gördüm Viktorun teklifini desteklemӓӓ bu toplumun dünneya çıkarılmasını. Yardımı açık ürektӓn verdim, çünkü bileerim ani dilimizin ilerlemesinӓ deyni bu önemni bir iş. Sayerım, ani kiyat olarak, bu toplum üüredicilerӓ okul programada nışanılı yaratmalardan kaarӓ, faydalı literatura kaynaa olacek. Nekadar taa çok kiyat gagauz dilindӓ çıkacek, okadar taa uzun onun ömürü, açıkladı Vitaliy Kürkçü.
‘Hakikatçıların sesi’ baş redaktoru Viktor Kopuşçu tanıtıma gelӓmedi, çünkü Türkiyada, Ankarada üürener. Kendi kutlamak sözlerini hem selemnerini prezentațiyanın pay alannarına o boba Sergiydӓn yolladı.
Yaratma toplumun ‘Hakikatçıların sesi’ tiraj sayısı - 200 kiyat. Onnarı daadaceklar Gagauziyanın bibliotekalarına hem okullarına.
